ಬೆಳೆದ ಹಾಗೆ ಆದ್ಯತೆಗಳು ಬದಲಾಗ್ತಾ ಹೋಗುತ್ತವೇನೋ. ಕಥೆ ಹೇಳೋದ್ರಲ್ಲಿ ಇರುವಷ್ಟು ಉತ್ಸುಕತೆ, ಕೇಳೋದ್ರಲ್ಲಿ ಇರೋದಿಲ್ಲ. ವಿರಳ. ಹೀಗೆ ಕಥೆ ಹೇಳಿ ಕೇಳ್ತೇನೆ ಅಂತ ಸಲೀಸಾಗಿ ಕೇಳಿಸಿಕೊಳ್ಳೋ ವ್ಯಕ್ತಿ ಸಿಕ್ಕಾಗ ಅಚ್ಚರಿ ವ್ಯಕ್ತ ಪಡಿಸೋರೂ ಸಹ ಕಡಿಮೆಯೇ. ಕಥೆ ಹೇಳಿ ಎಂದ ಕೂಡಲೆ, ಅಪ್ರಜ್ಞಾಪೂರ್ವಕವಾಗಿ ಮನುಷ್ಯ ತನ್ನನ್ನೆ ಕೇಂದ್ರೀಕರಿಸಿ ಅದರ ಸುತ್ತ ಸಿಕ್ಕ ಹಾಗೆಲ್ಲಾ ಹೆಣೆಯುತ್ತಾ ಹೋಗೋದು ಆತನ ಆಸಕ್ತಿ, ಅಭ್ಯಾಸ.
ನಾಲ್ವರು ಹೊಸದಾಗಿ ಒಟ್ಟಿಗೆ ಕೆಲಸಕ್ಕೆ ಸೇರಿದ ವ್ಯಕ್ತಿಗಳು, ಒಂದು ರಾತ್ರಿ ಯಾವುದೋ ಅಜ್ಞಾತ ಸ್ಥಳದಲ್ಲಿ ಕೂತು ಹರಟಲು ನಿರ್ಧರಿಸಿದರು. ಅದರಲ್ಲೊಬ್ಬ ಕಪ್ಪು, ಕುರುಚಲು ಗಡ್ಡದ, ಮಿತಭಾಷಿ ಒಂದು ಬಂಡೆ ಕಲ್ಲಿನ ಮೇಲೆ ಕಾಲ ಮೇಲೆ ಕಾಲು ಹಾಕಿ ಮಲಗಿ ಮಿಕ್ಕ ಮೂವರಿಗೂ ಕೇಳಿದ - ‘ನಿಮ್ಮದೆಲ್ಲಾ ಕಥೆ ಹೇಳಿ ಕೇಳ್ತೇನೆ’.
